Bakı Şəhər Gənclər və İdman İdarəsi, Azərbaycan Velosiped İdmanı Federasiyası və Respublika Olimpiya Ehtiyatları Qüvvələri İxtisaslaşdırılmış Uşaq-Gənclər Velosiped Məktəbinin birgə təşkilatçılğı ilə Pirallahı rayonunun məktəbliləri arasında velosiped yarışı keçirilib.
Bakı şəhərinin 2026-cı il “Dünyanın İdman Paytaxtı” seçilməsi münasibətilə təşkil olunan yarışda rayonun müxtəlif ümumtəhsil məktəblərini təmsil edən 30-a yaxın oğlan və qız şagird qrup ötüşməsində mübarizə aparıblar.
Oğlanların yarışında 243 saylı tam orta məktəbin şagirdləri Rəsul Əkbərov birinci, Yusif Şükürlü üçüncü yeri tutub. 235 saylı tam orta məktəbin təmsilçisi Şıxulla Abdulov ikinci nəticə göstərib.
Qızların mübarizəsində 235 saylı tam orta məktəbin şagirdi Gülay Şəbiyeva qalib gəlib. 186 saylı tam orta təmsilçisi Venera Ağayeva ikinci, 168 saylı tam orta məktəbin şagirdi Elmira Nəsirzadə isə üçüncü olub.
Fərqlənən şagirdlər medal və diplomlarla təltif olunublar. Qeyd edək ki, turnir Bakı şəhərinin məktəbliləri arasında keçiriləcək silsilə yarışların ilk mərhələsidir. Layihənin əsas məqsədi məktəblilər arasında velosiped idmanının təbliği, sağlam həyat tərzinin təşviqi və gənc istedadların üzə çıxarılmasıdır.
