Azərbaycan Velosiped İdmanı Federasiyası ilk dəfə 1992-ci ildə Ədliyyə Nazirliyində qeydiyyatdan keçirilsə də, geniş praktiki fəaliyyətə 2012-ci ildən başlayıb. Federasiyanın əsas məqsədi ölkəmizdə velosiped idmanının inkişaf etdirilməsi, velosipedçilərimizin Olimpiadalara, eləcə də digər mötəbər beynəlxalq yarışlara hazırlaşmasının və uğurlu nəticələr əldə etmələrinin təmin olunmasına çalışmaqdır.

İnsanlar, xüsusilə də uşaqlar və gənclər arasında velosiped idman növünün daha geniş yayılması, onların sağlam ruhda tərbiyə olunması Azərbaycan Velosiped İdmanı Federasiyasının fəaliyyətinin prioritet istiqamətlərindəndir.

Azərbaycanda Beynəlxalq Velosipedçilər İttifaqının (UCI) təqviminə salınmış ilk beynəlxalq velosiped yarışı 2012-ci ilin may ayında xalqımızın Ümummilli lideri Heydər Əliyevin xatirəsinə həsr olunmuş 23 yaşadək gənclər arasında keçirilmiş veloturdur. 1 il sonra isə dünya velosiped yarışları təqvimində öz layiqli yerini tutmuş Azərbaycan Turu (“Tour d’Azerbaidjan”) çoxgünlük velosiped yarışının keçirilməsinə başlanılıb.

2013-cü ildə 2.2 kateqoriyası almış və dünya velosiped aləmində böyük rəğbətlə qarşılanmış bu yarışa növbəti ildə 2.1 kateqoriyası verilib və artıq bu yarışlarda dünyanın bütün qitələrini təmsil edən kontinental komandalarla yanaşı peşəkar, yəni pro-kontinental komandalar da iştirak etməyə başlayıblar.

5 mərhələdən ibarət, 900 km-ə yaxın məsafəni əhatə edən “Tour d’Azerbaidjan” velosiped yarışı hər il müxtəlif şəhər və rayonlarımızı əhatə edən marşrutlar üzrə təşkil edilib. Yarış Azərbaycanda velosiped idmanının inkişafını şərtləndirən əsas amillərdən biri olmaqla yanaşı, günü-gündən gözəlləşən ölkəmizin bütün dünyada tanıtdırılması, onun turizm potensialını nümayiş etdirmək baxımından da çox səmərəli bir vasitəyə çevrilib.